Expourense acolleu este mércores unha nova edición de Inspiro, o encontro interxeracional que conecta o tecido empresarial cos distintos modelos formativos de Galicia, desde a universidade ata a Formación Profesional, organizado en colaboración coa empresa ourensá Dixital Gou. No marco desta xornada celebrouse a final do IV Concurso de Proxectos Emprendedores, no que competiron dez iniciativas seleccionadas entre unha trintena de propostas procedentes das universidades galegas e de varios centros educativos.

A Universidade de Vigo tivo un papel destacado, logrando o primeiro e o terceiro premio, con especial protagonismo do alumnado da Escola de Enxeñaría Informática do campus de Ourense. O proxecto gañador foi Sempre na Casa, desenvolvido por Paula Pato, Natalia Outomuro, Gabriel Macías e Sara Somoza. A iniciativa propón unha plataforma dixital que facilita a convivencia interxeracional e o alugueiro social, poñendo en contacto persoas maiores con espazos dispoñibles e estudantes que precisan aloxamento accesible. Ademais do premio económico de 700 euros, o equipo recibirá mentorización especializada, consolidando así unha proposta que xa fora recoñecida previamente no ámbito do Campus Auga.

Tamén da Universidade de Vigo foi o terceiro premio, para o proxecto Nova Terra, de Pelayo Patiño, Iago Lijó e Martín Barros. Esta iniciativa céntrase na recuperación de terreos afectados por incendios mediante o uso de tecnoloxías avanzadas e drones para a recollida de datos. O galardón, dotado con 350 euros e mentorización, reforza o papel do talento universitario —e particularmente do ámbito tecnolóxico— na busca de solucións innovadoras a retos reais.

En conxunto, os recoñecementos acadados evidencian o alto nivel do alumnado participante e subliñan o peso da formación en informática e tecnoloxía como motor de innovación e emprendemento en Galicia.

A nova completa pode consultarse no DUVI.